مرجيّحة من حبل وركّاية

مرجيّحة من حبل وركّاية.

رصاصة

لو فيي إسرقك و أهرب على غير دنيي
لو فيي إحملك و طير، طير بعيد بهالسما النقية
لو فيي إحجب عنك كل هالأصوات اللي عم تقتل الحرية
لو فيي بس طولك عمرك بكل دمعة من دموع عينيي

حبيبي خلي عيونك بعيوني
حبيبي ما تغمضهن حتى لو لثواني
حبيبي قلي آخر كلماتك خبرني خبريي
ضحكلي ضحكة، تنهدلي تنهيدة إنت و بين إيديي

حبيبي قلبك قلو دقاتو و قربت الفلة
قربت تغمض هالعيون و تتركني لحالي
قربت هالرصاصة تخلص شغلها و تسرقلي حياتي
حبيبي ما تخاف، رح تصير بين الملايكي

بكرا كلن أسود رح يلبسو بس أنا فستاني أبيض حرير
و إنت متقم بعلبة بيضا ناطرني متل الأمير
و أصوات النحيب ترافق مشيتنا بعرسك الكبير
حبيبي كلا كانت رصاصة بس أخدتك مني بكير…

وصية

يا رايح عهاك البلاد البعيدي
باعتي معك آخر وصية
بدي ياك توصلها ليللي ساكن عينيي
و تقلو ما نسيتو و عم ببكيه ليليي

يا رايح عأرض الأحباب
قلن حرقة شوقي حولت ناري لرماد
قلن قلبي داب من كتر الإشتياق
قلن بعدو ناطرهن رغم كل العذاب

خدلك كمشة تراب من الأرض اللي مشينا عليها هاك المشوار
بعتلو إياها تيضل ذاكر اللي صار
و قلو رغم إنو هالزمن قاسي و غدار
في قلب بحبو عم ينبض و ناطر رجعتو على نار…

عبالي

عبالي بهالليل ضمك لقلبي
عبالي تشبع من بسمتك عينيي
و ترجع تلمس ملامحك إيديي
عبالي الليلة لو بس تكون معي

عبالي شم عطرك بكل تنهيدي
عبالي لو مبسمك يجي عمبسمي
و تضيع الكلمات و يسكت صوتي
و تسمع إسمك عم ينقال مع دقات قلبي

آخ شو عبالي لو ترجع هالإيام فيي
و نرجع متل ما كنا و ترجعلي ضحكتي
عبالي يرجع إسمي عندك حياتي
عبالي شوفك و ترجعلي حبيبي

يا عيوني

يا عيوني لا بقا تدمعي
حبيبك خلص قلبو بطل معي
رسمك عندو صار صفحة طواها الزمان
بعرف صعبة تنسي هاك الوج اللي كان
ببسمة منو يخليكي متل نجوم اللي بالسما تلمعي

يا قلبي دخيلك لا تزيد عليي حسرتي
راح اللي كان سبب كل فرحتي
راح و تركك عم ترجف رجفة بردان
و احترقت تتصير متل الرماد الطاير بطي النسيان
و صرت شوي شوي تموت و تختفي

آخ يا زمن كيف معي برم الدولاب
تصير شقفة ذكرى عند أغلى الأحباب

بكير

حبيبي، بكرت عليي الفلة كتير
رحت و أخدت قلبي معك أسير
و إذا بتسألني شو بني و ليش البكي و النحيب
بضيعوا كل كلماتي و ما بيبقى إلا راح الحبيب
صعبة خبر من بعدك بحالي شو صار
صعبة فسرليش انقلب نهاري ليل و ليلي نهار
صرت ضيع عالطرقات اللي مشيناها إيد بإيد
و صرت شوفك بكل زاوية و عكل مفرق و وجعي يزيد
و قعدت قدام البحر مطرح ما قعدنا نحنا و عشاق
إشكي همي للموج و خبر قديش قلبي إلك مشتاق
و أنا إحكي و دموعي تنزل متل شي نهر غزير
!تاختفت الغصة و صرخ صوتي حبيبي كان بعد بكير

جدي

بهالأيام عم بشتقلك

عم بفتقد لحنانك

بتطل عليي بالليل

بحلمي و بتميل ليي ميل

بوسي بطتبع على خدي

و بقلك اشتقتلك يا جدي

بترد عليي و بكل وضوح

إنت اللي ما كنت تحكي و تبوح

ما تخافي و قولي يا رب

أنا معك على طول الدرب

!هاي

هاي! إنت اللي قاعد بقلبي

هاي! إنت اللي مستحوذ على عقلي و كياني

طلاع و تركني بقا بحالي

بعرف إنو حبي لإلك كتير كبير

بعرف بحبك أكتر من نفسي بكتير

بس القصة بتنقاس عتنين بالحب

و شايفي حالي ضايعة بحبك لوحدي مع هلقلب

فل و ريحني من عذابي

فل و تركني مع فراقك عذابي التاني

بس شكلك إن قررت و فليت

أو شكلك إن فضلت و ضليت

أنا وحدي اللي كسباني

عذاب لهالقلب اللي صرلو فترة بحبك عم بعاني

2 برمة دولاب

كنت شايفي الحياة بتاخد و ما بتعطي

كنت عايشي و كنت الفرح إستعطي

شفتك واقف ناطر عدربي

شفتك واقف و كأنك ناطرني

ناطر تأوصل و تبرملي دولابي

ناطر مبتسم تترجع زهرة شبابي

زهرة دبلت مع مر أيامي

دبلت من ورا كم حب أناني

رجعت فرفحت و تغير زماني

و رجع دولابي يبرم برمة فرحانة

برمة دولاب

يا ربي كنت ماشيي و مش سألاني

شو صار، شو عم بيصير، أو شو عم عاني

كنت عم بغلب قهر هالحياة بضحكة دفياني

و واجه صعوباتها بأفكار فهماني

فجأة، و على غفلي من زماني

و بلا وعي، كأنو انسرق وعيي مني

اطلعت حواليي و شفتو بعينيي

و رجف قلبي كأنو بكانون و الدني برداني

حبيتو من اللحظة اللي فيها حياني

هديتو قلبي، عقلي و كياني

هديتو كل ما بملك من غالي

هديتو، و كان بكير عهدايا عشقاني

هديتو، و شو هلعملي السودا يا نفسي

مش عارفي إنو رح ينساكي أول ما الشمس تقفي؟!

أول ما يطلع فجر و يرجع النور عالدني

رح يكون نسي و انتي بالحزن غرقاني!

ذات الغلطة القديمي يا قلبي

دخلك ما بتتعلم من الماضي؟!

جراحك رجعوا نفتحوا و رجعت للبكي

و رح يرجع يبرم الدولاب و ترجع تحاسب الدني